პლანეტის უმდიდრესი ადამიანის, ელონ მასკის კუთვნილი Starlink საქართველოში ოპერაციებისთვის ემზადება.
29 ივნისს Starlink Holdings Netherlands-მა დააარსა შვილობილი კომპანია „Starlink Georgia“ საქართველოში და მიმართა კომუნიკაციების კომისიას ავტორიზაციისთვის. მარეგულირებელი კომპანიის მიერ წარმოდგენილი დოკუმენტაციის განხილვას 14 ივლისს გეგმავს.
Starlink უზრუნველყოფს მაღალსიჩქარიან, დაბალი ლატენტურ ფართოზოლოვან ინტერნეტს მთელ მსოფლიოში, მათ შორის იმ ადგილებში, სადაც ინტერნეტი ძვირია, არასანდო, უხარისხო ან სრულიად მიუწვდომელია. SpaceX-მა დღემდე გაუშვა 2700-ზე მეტი Starlink დაბალი ორბიტის (LEO) თანამგზავრი.
საქართველოს კონტექსტში Starlink განსაკუთრებით მნიშვნელოვანი და საინტერესოა მთიან რეგიონებში და ფართოზოლოვანი ინტერნეტის გარეშე დასახლებებში.
Starlink ინტერნეტის მისაღებად დიდი ინფრასტრუქტურა არ არის საჭირო. საჭიროა მხოლოდ კვების წყარო და მიმღები მოწყობილობა. შედეგად, შესაძლებელია ინტერნეტით სარგებლობა მსოფლიოს ნებისმიერ წერტილში.
„SpaceX ამჟამად მუშაობს ქართულ ბაზარზე საინტერესო ნიშების შესწავლაზე და ემზადება Starlink-ის ოპერაციების კომერციული გაშვებისთვის საქართველოში. ვფიქრობ, ეს ფაქტი ძალიან მნიშვნელოვანი მოვლენაა ქვეყნისთვის და ტელეკომის სექტორისთვის, რადგან Starlink-ის დანერგვის შემდეგ საქართველოში ხელმისაწვდომი გახდება სატელიტური ინტერნეტი და ეს გახსნის ფანჯარას ინოვაციური ციფრული მომავლისკენ“. სერვისების ბაზრის განვითარებისთვის“, – განაცხადა კომუნიკაციების კომისიის წევრმა ეკატერინე იმაძემ 21 ივნისს SpaceX-ის წარმომადგენელთან შეხვედრის შემდეგ.